Oitenta pezas audiovisuais participan na primeira edición do Concurso de Videoclips Galegos, creado pola produtora cultural Play Plan Cultural -organizadora do Festival SonRías Baixas- e polo Festival Internacional de Curtametraxes de Bueu (FICBUEU) para promover a cultura musical galega.

Entre os videoclips recibidos abundan o rock, o punk, o rap, o ska e o metal, pero tamén hai oco para o pop, o folk, o trap, o indie e a electrónica. “Cómpre salientar”, aseguran dende a organización do certame, “a enorme calidade do audiovisual galego”. Un comité creado polo FICBUEU seleccionará ao longo das próximas semanas os finalistas, que se proxectarán durante os días do Festival SonRías Baixas e que serán valorados por un xurado composto por unha persoa da Academia Galega do Audiovisual, unha persoa da Asociación FICBUEU, unha persoa de Play Plan Cultural e dúas persoas das bandas participantes no SonRías Baixas 2018. Os gañadores recollerán o seu galardón: Primeiro premio ‘Ánfora de Ouro’, Segundo premio ‘Ánfora de Prata’ ou Terceiro premio ‘Ánfora de Bronce’ o sábado 8 de setembro durante o transcurso do XI Festival Internacional de Curtametraxes de Bueu.