A 18ª edición do Festival SonRías Baixas non se poderá celebrar nas datas previstas, os días 30 e 31 de xullo e 1 de agosto deste 2020. A evolución da crise sanitaria sen precedentes que estamos a padecer e a falta de definición nas medidas que deberiamos aplicar os eventos musicais na “nova normalidade” para garantir a plena seguridade do noso público, das e dos artistas e do resto das persoas que traballan no festival obrígannos a pospor o noso 18º aniversario aos días 5, 6 e 7 de agosto de 2021. Podedes ler o comunicado completo nesta ligazón. 

SONRÍAS BAIXAS, APRAZADO A 2021

Os compradores e compradoras de abonos para o SonRías Baixas 2020 recibiredes un correo electrónico entre o mércores 20 e o luns 25 de maio con información sobre o adiamento e sobre as diferentes opcións que vos ofrecemos con respecto ás vosas entradas: 

  1. Queres asistir ao SonRías Baixas 2021. A túa entrada será válida automaticamente para o SonRías Baixas 2021 se non solicitas a devolución no prazo que marca a lei. Ademais, as persoas que decidades conservalas recibiredes unha pequena compensación pola vosa fidelidade e confianza. A vosa praza na zona de acampada de acampada tamén está asegurada, se a tiñades reservada para este ano. 
  2. Non sabes se poderás asistir. Un par de meses antes do festival, habilitaremos a opción de cambio de nome, válido unha soa vez por entrada, por se non puideses asistir e quéreslle ceder ou regalar a entrada a outra persoa.  
  3. Queres solicitar a devolución do importe da túa entrada. Antes do luns 25 de maio recibirás un correo coas instrucións na dirección que nos indicaches ao comprar a entrada. Por favor, ten en conta que só pode reembolsarse o importe da entrada ao comprador orixinal. En cumprimento co establecido no artigo 36 de RDL 11/2020, deberedes solicitar a devolución antes do luns 8 de xuño ás 23:59h. A partir dese mesmo momento, comezarán a ingresarse os importes das entradas, sen ningún custo adicional. Iso si, os gastos de xestión de compra non nos pertencen e, por tanto, non poderemos devolvérvolos. Se despois de 5 días laborables non recibiches o reembolso da túa entrada, por favor, ponte en contacto connosco en festival@sonriasbaixas.info. 

PREGUNTAS FRECUENTES

Onde e cando se celebrará SonRías Baixas? 

A 18ª edición do SonRías Baixas terá lugar os días 5, 6 e 7 de agosto de 2021 no recinto Multiusos da Estacada en Bueu (Pontevedra). 

Por que se pospuxo o festival? 

Tras valorar coidadosamente todas as opcións e atendendo ás recomendacións gobernamentais e ás normas vixentes en materia de protección e de seguridade de público e traballadores, esta decisión foi a única posible para garantir plenamente a saúde e a seguridade de todos os asistentes, artistas e traballadores involucrados. 

É válida a miña entrada de 2020 para o 2021? 

A túa entrada será válida automaticamente para o SonRías Baixas 2021 se non solicitas a devolución no prazo que marca a lei. Ademais, as persoas que decidades conservalas recibiredes unha pequena compensación pola vosa fidelidade e confianza. É esta fidelidade e confianza a que nos permite seguir traballando para poder ofrecervos tres días e tres noites inesquecibles. Sen o voso alento, todo este esforzo sería inútil. 

Non recibín o correo, que teño que facer? 

Revisa a túa bandexa de spam ou correo non desexado e, se non recibiches o email o 25 de maio, ponte en contacto connosco indicándonos o teu nome, apelidos e o mail que utilizaches para realizar a compra da entrada. 

Manterase o programa da edición 2020? 

Estamos a traballar coas e cos artistas para reprogramar as súas actuacións en 2021 e a maior parte confirmounos a súa total dispoñibilidade. Con todo, polo momento, non podemos garantir que o programa de 2021 vaia ser idéntico ao previsto na edición 2020. 

Que pasa co diñeiro que tiña recargado na miña entrada? 

Se precargaras a túa pulseira ao comprar a entrada, o importe pasará automaticamente a estar dispoñible na túa entrada para o 2021. E, se solicitas a devolución, reembolsaráseche íntegro. 

Quero que me reembolsen o diñeiro da precarga, pero quero conservar as miñas entradas para o 2021. Que teño que facer? 

Sentímolo, pero non nos é posible xestionar esta casuística. Se pides a devolución, reembolsaráseche o diñeiro da entrada e da precarga, pero non podemos facelo por separado. 

Quero que a miña entrada valla para o SonRías Baixas 2021. Que teño que facer? 

Nada. Se non solicitas a devolución no prazo que nos marca a lei, a túa entrada será válida automaticamente para o SonRías Baixas 2021. Iso si, deberías recibir igualmente un correo con información respecto diso. Se non é así, por favor, ponte en contacto connosco a través do correo-e festival@sonriasbaixas.info. 

Non poderei asistir ao SonRías Baixas 2021. Que teño que facer? 

As persoas que comprarades unha entrada para o SonRías Baixas 2020 recibiredes un correo electrónico antes do luns 25 de maio con información sobre como solicitar o reembolso do importe da vosa entrada e do saldo precargado na mesma, de ser o caso. Se compraches unha entrada e non recibiches esta información, por favor, ponte en contacto connosco a través do correo-e festival@sonriasbaixas.info. 

Devolveranme o importe íntegro da miña entrada? 

Si, salvo os gastos de xestión derivados do proceso compra da entrada, que non nos pertencen. O proceso de devolución non terá custo adicional para ti. 

Que necesito para pedir o reembolso da miña entrada? 

Se es a persoa que comprou a entrada, recibirás un mail na conta de correo electrónico que nos deches no momento de realizar a compra, cunha ligazón para poder solicitar a devolución. Para facelo só necesitarás ter contigo o código da túa entrada. 

Como me devolveredes o diñeiro da miña entrada? 

Devolveráseche á mesma tarxeta de crédito que usaches para comprala.  

Teño a entrada, pero comprouma un amigo. Que teño que facer? 

A devolución do importe da entrada só a pode solicitar a persoa que realizou a compra da entrada. Deberás pedirlle ao teu amigo que che devolva o importe que ti lle entregaches para comprar a entrada.   

Até cando podo solicitar o reembolso da entrada? 

Até o luns 8 de xuño ás 23:59 h. 

Que pasa se non solicitei a devolución? 

Se non solicitas expresamente a devolución do prezo da entrada, a túa entrada pasará automaticamente a ser válida para o SonRías Baixas 2021. 

Poderei solicitar un cambio de nome máis adiante? 

Si. Un par de meses antes do festival, habilitaremos a opción de cambio de nome, válido unha soa vez por entrada, por se non puideses asistir ou se queres ceder ou regalar a entrada a outra persoa.

COMO SOLICITAR A MIÑA DEVOLUCIÓN

Todas as persoas que comprastes unha entrada para o Festival SonRías Baixas 2020 recibiredes un mail na conta de correo electrónico que nos indicastes ao realizar a compra. Nese mail, atoparedes unha ligazón que porá solicitar reembolso. Para solicitar a devolución do importe da túa entrada, deberás premer nesa ligazón, introducir o código da túa entrada e premer no botón de verificar solicitude. Unha vez feito isto, recibirás un novo email confirmando a devolución. Non é necesario que fagas nada máis. En todo caso, nese último correo, recibirás tamén unha ligazón para que poidas ver en todo momento o estado da túa solicitude. E, se tes dúbidas, sempre poderás contactar connosco a través do correo-e festival@sonriasbaixas.info. 

SonRías Baixas 2021 5, 6 e 7 de agosto de 2021