PREGUNTAS FRECUENTES

Que prezo teñen as entradas?

As entradas teñen tres prezos: 23€, 26€ e 29€ en función da localización dos asentos. O prezo incrementa en función da proximidade ao escenario. Así, se estás no primeiro tramo de asentos ou zona máis próxima ao Escenario Xacobeo 21-22, a túa entrada será de 29€. Mais se optas por un asento máis alonxado, o prezo tamén será inferior (26€ ou 23€).  

Cada entrada está asociada a unha localización ou asento dentro do recinto?

Si, todas as entradas do ciclo de concertos SonRías Baixas teñen o seu asento preasignado. No momento no que merques a túa entrada, escollerás o teu asento. 

Co obxectivo de favorecer a comodidade do público á vez que aplicamos os protocolos de prevención da covid-19, este ano o recinto estará dividido en tres zonas, en función da proximidade ao escenario Xacobeo 21-22, e cada zona, á vez, en sectores.  

Haberá entradas para menores de 12 anos?

Si! Un ano máis facilitaremos que gocedes dos concertos en familia ou, cando menos, as máis pequenas e pequenos da casa poidan escoitar a música máis divertida 😉 Todas as menores entre 0 e 12 anos (ambos inclusive), terán unhas cadeiras asignadas e deberán estar acompañadas dunha persoa adulta responsable.  

Como podo mercar entradas para menores de 12 anos?

Á hora de realizar a compra de entradas, terás a opción de seleccionar o ticket para menores de 12 anos, que teñen un custo de 10€ máis gastos de xestión. Durante o proceso de compra poderás descargar o documento de autorización da asistencia; mais se non o fixeches, non pasa nada: aquí podes descargar o documento. Lembra que tes que entregalo na entrada ao recinto!

Cantas entradas podo mercar nunha mesma compra? Poderemos sentarnos xuntas?

Podes mercar ata seis entradas contiguas se están dispoñibles. Se a situación sanitaria vixente no momento da celebración, as cadeiras poderán estar xuntas. Mais pode ser que, chegado o día, só podades estar de dúas en dúas, ou por grupos de convivintes. Iso aínda non volo podemos confirmar xa que dependerá da normativa que, como sabes, é cambiante.

Ata cando podo mercar entradas para SonRías Baixas 2021?

Poderás mercar entradas ata que se esgoten, claro 😊  
O despacho de billetes é online na plataforma Enterticket, e a venda permanecerá activa até 30 minutos despois do inicio da última actuación de cada noite. Se precisas mercar unha entrada de última hora no prazo de tempo indicado, poderás facelo desde o teu dispositivo móbil.

Teño entradas de 2020 e quero transformalas en tickets para 2021. Se non me chega o saldo para mercalas, que teño que facer?

Non te preocupes, poderás pagar o importe restante coa túa tarxeta de crédito.  

Que pasa se só quero usar o saldo dunha das entradas?

Sentímolo, pero o saldo compútase por compra, se o utilizas perderás o dereito das túas entradas para 2022.

Que pasa se non gasto todo o saldo?

O saldo só se poderá utilizar para comprar calquera das entradas do ciclo de concertos do SonRías Baixas 2021 (o do Festival SonRías Baixas 2022). Tamén poderás cederlle o código a outra persoa para que utilice o que sobra.

Merquei unha entrada mais non podo ir. Podo regalarlla a outra persoa?

Se non podes asistir e queres regalar ou ceder a túa entrada a outra persoa, poderás facelo, mais é a túa responsabilidade mudar o nome e datos de asistente. Terás que facelo a través da web https://venta.enterticket.es/cambios .

O cambio é gratuíto, pero só é posible facelo unha vez.

Haberá zona de acampada?

Sentímolo moito, pero por mor das condicións sanitarias vixentes, non é posible contar este ano con zona de acampada.

Como van ser os concertos?

Cada noite celebraremos ao aire libre dous concertos do SonRías Baixas. O recinto estará perfectamente sectorizado e equipado, con todas as medidas de seguridade e hixiene pertinentes, para garantir que poidas gozar da música ao vivo seguindo a normativa sanitaria vixente no momento de celebración.  

A que hora serán os concertos?

Todos os concertos terán lugar en horario nocturno e este é o horario de apertura de portas que recomendamos seguir: 

Martes 3, mércores 4 e xoves 5:  
ZONA A| SECTOR 1 – 20:10h / SECTOR 2 – 19:30h  
ZONA B | SECTOR 1 – 20:30h / SECTOR 2 – 19:50h  
ZONA C | SECTOR 1 -19:30h / SECTOR 2 – 19:50h 

Venres, 6, sábado 7 e domingo 8: 
ZONA A | SECTOR 1 – 19:55h / SECTOR 2 – 19:00h
ZONA B | SECTOR 1 – 20:25h / SECTOR 2 – 19:25h
ZONA C | SECTOR 1 – 19:00h / SECTOR 2 – 19:25h / SECTOR 3 – 19:55h / SECTOR 4 – 20:25h

 

Como fago para acceder ao recinto?

O máis importante é que teñas a túa entrada no teu dispositivo móbil. Nela, ademais de ter o código de acceso, atoparás os datos do teu asento preasignado. En función da zona e do sector no que esteas, terás un acceso diferente. Aínda que pareza complicado, non ten perda. E, ante calquera dúbida, consulta co persoal da organización.  

Se tes entrada para a zona A ou B, as máis próximas ao Escenario Xacobeo 21-22, deberás facelo pola rúa José María Estévez. Mais se tes entrada para a zona C, o teu acceso estará pola rúa Pazos Fontenla, á altura do centro Colexio Virxe Milagrosa.

Debo facer unha PCR ou ter a pauta de vacinación completa para asistir ao SonRías?

Para asistir a SonRías non é necesario que fagas PCR ou que posúas o certificado de vacinación, xa que SonRías Baixas non é unha actividade de lecer nocturno e ten lugar no exterior, ao aire libre. Mais, ante calquera sospeita ou posibilidade de ter COVID-19, queda na casa. 

O SonRías é a ceo aberto e hai distancia de seguridade de 1,5m. Debo levar máscara?

Sempre. En todo momento e lugar debes levar posta a túa máscara. Unicamente pódese retirar no momento específico de comer ou de beber, ou nas zonas habilitadas para persoas fumadoras (tabaco), sempre e cando se manteña unha distancia interpersoal de, como mínimo, 2 metros. 

As persoas sen máscara ou que non queiran poñela non poderán permanecer no recinto. E  para acceder a el será imprescindible o correcto uso da mesma.

Que máscara debo utilizar?

Desde SonRías Baixas recomendamos o uso de máscaras FFP2 ou, no seu defecto, quirúrxicas ou hixiénicas. 

É seguro SonRías Baixas? Como garantides que non haxa concentracións puntuais?

Contamos cun protocolo de prevención de covid-19 específico que podes consultar nesta mesma web.

Unha vez chegues ao recinto, atoparás percorridos sinalizados para acceder a cada zona ou sector e indicacións de como circular entre eles. Respecta sempre os sentidos sinalados e as recomendacións que che traslade o persoal do festival.  

O recinto estará dividido en sectores con equipamentos independentes: cada espazo terá a súa propia barra, aseos, puntos de recarga e de merchandising para un máximo de 500 persoas. Non estará permitido invadir ou camiñar por un sector distino ao da túa entrada.  

Podo erguerme do asento para ir ver colegas ou marchar a casa?

Durante o evento só poderás abandonar o teu asento para acudir aos aseos ou a barra. Lembra que non podes cambiar de sitio, mover as cadeiras ou erguerte para outras accións que non sexan as comentadas.   

O público poderá abandonar o recinto no momento no que o indique o persoal do festival, de xeito que non teñas présa por saír antes ca ninguén. Cada sector e ringleira de cadeiras terá a súa propia quenda de saída. Mais, se tes unha urxencia, contacta co persoal da organización para que che dean as indicacións precisas no instante que solicites axuda.

Se quero mercar algo de beber no recinto, podo facelo?

Si. Mais desde SonRías Baixas recomendamos que non uses cartos en efectivo. O método de pago realizarase con tecnoloxíacontactless, vía recarga online e TPV.

Podo levar comida da casa?

SonRías Baixas non conta con servizo de comida, mais podes traer a túa da casa, sempre e cando estea en tea, papel film ou similares. Non se permitirá o acceso ao recinto doutro tipo de envases.
Ademais, tampouco estará permitido levar e comer snacks que che obriguen a ter a máscara baixa (pipas, pistachos, patacas, etc). 
 

E podo levar bebida da casa?

Podes acceder ao recinto con botellas de plástico brando, de ata 0,5L, con auga, sempre que estea precintada -cuxo precinto se quitará no acceso ao recinto-. Lembra, entón, que non poderás acceder con bebida que estea en calquera outro tipo de envase.

Podo acceder ao recinto con paraugas?

Si, sempre e cando non sexa de punta, xa que poden ser potencialmente perigosos para as demais asistentes ou para as artistas.

En cumprimento da normativa en materia de seguridade, a Organización ten establecido que non se admitirá ningún obxecto que poida supor un potencial perigo para as persoas asistentes, ou que poida ser usada como arma.

En uso das facultades e prerrogativas que a lexislación vixente outorga aos organizadores de espectáculos (art 21.2 c, da Lei de Espectáculos de Galicia), a Organización prohibe a entrada de paraugas de punta no recinto do festival. Estes obxectos poderán ser requisados pola Organización no acceso ao recinto e devoltos á persoa propietaria cando abandone o mesmo.

Haberá pulseiras cashless para recargar e pagar?

 Si. Ao acceder ao recinto, poderás obter unha pulseira que terá validez ao longo de todo o ciclo de concertos. A pulseira terá un código que deberás introducir en https://bit.ly/recarga_SonRias2021, e a recarga mínima será de 10 euros (mais todo o que non utilices volverá de novo a túa conta).

É 
moi importante que non perdas a pulseira, pois para  solicitar a devolución do saldo, unha vez remate o ciclo, deberás usar ese código.

Podo mercar entradas coa miña pulseira cashless?

Non, a pulseira  estará habilitada para a compra de bebida ou de merchandising no recinto.