A Deputación de Pontevedra impulsou, por vez primeira, o pasado ano a creación dunha marca para acoller sete dos principais festivais de verán da provincia de Pontevedra. Así naceron os “RíasBaixasFests”, rede que agrupaba a Cultura Quente, PortAmérica, Atlantic Fest, Festival SinSal, SonRías Baixas, O Marisquiño e Revenidas.

Dous anos despois de apostar pola promoción turística do circuíto de festivais, a iniciativa demostrouse como un éxito, tal e como demostran os últimos datos de visitantes. No seu conxunto, os eventos aumentaron notablemente a súa asistencia respecto de edicións anteriores e reuniron en total a máis de 260.000 persoas. Ademais, as ocupacións hostaleiras durante os días nos que se celebraron os eventos foron do 100 % practicamente en todas as ocasións.

Neste sentido, a presidenta da Deputación -Carmela Silva- adiantou que o Plan Estratéxico de Turismo que está a elaborar a institución provincial xa pon de manifesto que os festivais de música son unha das grandes liñas de actuación para turismo Rías Baixas. E sinalou que a Deputación seguirá apostando por esta iniciativa nun futuro.